泛民主派在選委會委員選舉中，得到一百三十幾席，因此已宣佈競選特首嘅梁家傑有希望獲得最低限度嘅一百名選委提名，有資格與曾特首或任何其他中方合意嘅候選人爭奪特首寶座。
選特首可用打吡賽比喻，明年三月十八日星期日跑打吡，與特首選舉日期好接近，𠵱家好多買入高價馬嘅馬主好心急，希望自己隻馬攞到較高評分，有資格跑打吡，馬主Ｎ話四歲馬有一百分在手，應該可以幾老定，但目前仍然只係評分八十至八十五嘅，就好心急咯。攞到足夠評分參加打吡，未必可以贏，舉個例，十四匹入閘馬之中，最高分嗰隻如有評分一百一十，你自己嗰隻係第十四號（只限十四隻馬參加），得九十分，如果贏得出，就係大冷門。呢，曾蔭權先生就係評分一百二十嗰隻馬，梁家傑嘅評分勉強去到九十幾，正是有得入閘，冇得贏。
話雖如此，養一隻馬能有資格入閘跑打吡已經係馬主莫大榮譽，易招一啲眼淺之人眼紅。乜唔係呀，政協代表劉迺強首先喺《信報》發炮，叫梁家傑照吓鏡先，語言好帶侮辱性。喂，在現代社會，邊個成年人想競選公職，都有資格，使乜去照鏡？即使係豬八戒咁嘅樣，唔通政府可以禁止佢參選乎？
劉政協嘅劉氏宗親夢熊仲大手筆，喺《明報》刊登全版廣告嚟「分析」梁家傑究竟是否「具備大家提名他出任特首的資格」，從梁大狀反對二十三條立法、反對人大釋法、爭取盡快雙普選、反對擴大選委會至一千六百人等四大方面，指一眾選委冇理由提名梁家傑競選特首，如果香港人有一個反對派做特首，肯定冇啖好食咁話。
兩位劉生嘅文章，可列入得啖笑之列，益晒梁家傑。一位世姪女，喺政府機構做事，正籌備緊婚禮，睇到劉迺強文章，為之怒火中燒，立即執筆為文，投稿《信報》（未知登唔登），反駁劉政協。又有咁啱嘅，呢位世姪女律師，又係劉氏宗親！三位劉氏開展「梁家傑照鏡」之辯論，相信會有其他人加入。