現年35歲的梁漢文（梁炳）入行以來星途崎嶇，至早前主持人氣節目《美女廚房》才再次鯉魚翻身，趁勢開演唱會賺老婆本，並宣布07年跟同居女友林文慧（Karen）結束10年愛情長跑。曾揚言可在婚前生BB的梁炳，日前拖稍微發福的Karen逛銅鑼灣，狂掃減價BB衫，兩人得悉有記者在場後即尷尬閃避，其後男方更對女友懷疑有餡一事狂耍太極。
出身自第8屆新秀歌唱比賽的梁漢文，轉眼間已入行17年，多年來星途如坐過山車，早前他夥鄭中基和方力申主持無綫人氣節目《美女廚房》，令沉寂多時的事業再有起色。上月踏入35歲的梁炳馬上乘勢𢱑銀，假紅館舉行兩場「梁漢文我愛廚房演唱會」，更公開承諾07年辦喜事，與曾任模特兒的同居女友林文慧結婚。
梁炳和Karen至今拍拖9年，兩人一直計劃趁明年拍拖10周年拉埋天窗。由於陳奕迅和李克勤等男歌手均在今年結婚，故梁炳也被感染希望成家立室，早前還聲稱不排除婚前生仔，本周一晚他和Karen拍拖逛童裝店買嬰兒衫，不禁令人懷疑他會在明年做人老公兼做老竇，來個雙喜臨門。
腰肢渾圓
笑笑口摷七折貨
當晚梁炳偕女友拍拖往銅鑼灣利園商場逛街，沒想到吸引他們的並非是名牌戰衣，反而是cutie可愛的BB衫。現場所見，Karen比前稍添圓潤，她穿短褲襯粗跟鞋，凸顯渾圓腰肢，一張臉蛋亦比之前豐滿，梁炳則全程傍實，陪她逛進COMMECAKIDS童裝專門店掃嬰兒服。Karen揀衫仔時表現極之細心，不時面露笑容，又在放置七折貨品的車仔內勁摷減價貨，反而梁炳對揀BB衫一面茫然，只靜靜地站在女友身邊，不停嘴扁扁。
揀足20分鐘後，Karen大有斬獲，她自行碌卡付賬後即挽兩大袋BB衫興奮離場，再和梁炳步往nicholas&bears童裝店繼續血拼，一會後兩名女伴到場會合Karen，三個女人即往減價貨堆大摷特摷，此時梁炳發現記者，即上前向記者笑說：「你放過我啦，唔好影好冇？」問梁炳是否做老竇才揀BB衫？他卻尷尬說：「唔係，冇呀。」語畢即返店內向女友通風報信。
收入大增
成家立室合時宜
Karen同行女伴抗拒上鏡，寧願踎在一角迴避，Karen見狀竟有樣學樣，忽然騎呢一踎，輕托香腮，眼見三女齊齊踎，尷尬的梁炳只好按電話亂說一通後，才以背部遮擋鏡頭讓女友碌卡埋單。兩人離開童裝店時，記者再問梁炳其女友是否有喜？他說：「我唔會答你呢個問題。」此時Karen女伴搶說：「個BB我㗎！」登時大家都笑了出來，和緩尷尬氣氛，然後梁炳與女友分頭走，各自坐的士離開。
星海浮沉的梁炳今年借《美女廚房》走出困局，兩場演唱會、唱片分紅及無綫騷等，估計全年收入約300萬元，相比起他在01年因欠交供款被財務公司拖走保時捷跑車，要許志安借款50萬救急的情況差天共地，難怪梁炳趁勢好趕明年做老襯，上周他便和女友到羅便臣道睇樓，準備築愛巢迎接新家庭。
採訪、攝影：娛樂突發組
