袁彩雲過聖誕未必一定會燒火雞，但就一定會有隻德國燒豬手同德國腸沙律助陣，點解？皆因彩雲在德國土生土長，可謂由細食豬手食到大，而且每逢佳節就倍思豬，過聖誕當然要撐自己的傳統家鄉菜啦！即使今日平安夜，都要趕住去拜師救急學燒豬手！
記者﹕趙珮倩 攝影﹕譚盈傑
示範﹕DelicatessenCorner(23693111)助理總廚何律勳
鳴謝﹕Pearls&Cashmier服裝提供、just2girls飾品提供(28101488)
聖誕燒豬手
需時：1小時40分鐘(不計醃製時間)
材料：豬手500g、鹽/小茴/紅甜椒粉/蒜茸/生油各適量、酸椰菜50g、洋葱絲/煙肉碎各半杯、雞湯/水各500毫升
做法：豬手以熱水烚5分鐘，待凍後以鹽和蒜茸搽勻，然後撒上小茴和紅甜椒粉，再掃上生油，替豬手按摩幾下，醃至入味。焗爐以550℃預熱20分鐘，將豬手焗45分鐘後，降溫至450℃火再焗45分鐘即可。酸椰菜沖水瀝亁，切絲，混入洋葱絲和煙肉碎，倒入雞湯及水煮滾，瀝亁後上碟伴菜。
貼士：靚嘅燒豬手最緊要皮脆肉嫩，如果焗完首45分鐘發現啲皮仲未脆，可淋上一層生油猛火再焗一陣；如果想知隻豬手熟透未，可用刀仔篤一篤，見肉軟腍冇血水滲出即係食得；又如果心急想佢快啲熟，可輕輕包一層錫紙，不過千祈咪密封，否則層脆皮會變腍。
知多啲：燒豬手唔好貪健康搵橄欖油代替生油，因為橄欖油受唔到咁熱嘅溫度，會燒唔起隻豬手。
珍肝釀火雞
需時﹕2小時
材料：火雞4kg、珍肝(雞雜)400g、栗子600g、洋葱100g、法包1/2條，蛋1隻、鹽/胡椒/生油各適量
做法：先將栗子和洋葱炒香，混入已攪碎的珍肝、法包粒，與雞蛋攪勻，成餡料釀入火雞中；火雞外層以鹽、胡椒和生油搽勻，焗爐以400℃預熱15分鐘，放入火雞焗1小時30分鐘(時間長短視乎火雞重量)。
知多啲：大部份火雞都插有火雞烤針，當火雞熟透支針會自動彈起，咁就知佢幾時熟啦！
蟹肉牛油梨沙律
需時﹕25分鐘
材料：牛油果1個、阿拉斯加蟹腳1隻、檸檬汁/鹽/黑胡椒少許、沙律菜/沙律醬各適量
做法：蟹腳拆肉，以少許鹽調味；牛油果起肉切粒，加入少許檸檬汁帶出牛油果香味，再撒鹽和黑胡椒，混入蟹肉和沙律醬拌勻，配上沙律菜上碟即可。
德國腸芝士沙律
需時﹕20分鐘
材料：德國腸80g、瑞士芝士60g、洋葱20g、酸瓜10g、鹽/胡椒少許
汁料：芥辣1湯匙、橄欖油/醋各1茶匙
做法：德國腸去衣切片，芝士切薄片，洋葱、酸瓜切絲，以鹽和胡椒辟洋葱腥味，混入汁料，拌勻即可。
貼士：拌好的腸沙律最好放雪櫃1-2小時後才享用，咁樣腸同酸瓜嘅味先可以完全滲出嚟，好味好多㗎！
彩雲夾韜韜 中西合璧燒豬手
彩雲食咗咁多年燒豬手，終於有機會學識整，仲話要青出於藍，混合埋韜哥秘方。「我跟食神韜韜主持節目時偷過師，燒燒肉時要喺啲肉面層拮窿，再撒啲糖等佢燒嘅時候更搶火，增加表層嘅色澤同埋令佢脆啲，我估豬手都可以用呢個方法。食豬手最緊要層皮脆，但裏面嘅肉又唔可以燒到亁晒，真係好難整得好食。試過同朋友去奧地利食過一隻豬手，層皮係硬到咬唔到，結果我朋友食到咬崩牙㖭!」
