周星馳近年為佢嘅電影王國同地產事業勞心勞力，搞到成個人好似歷盡滄桑咁款，44歲已經滿頭白髮。不過星爺嘅身形就keep得好好，每次出鏡都fit到漏，喺電影《功夫》同《少林足球》裏面仲大騷鋼條肌肉，令馮仁昭好鬼羨慕
雙帽笠頭遮面
究竟星爺嘅弗爆身形係點樣練番嚟㗎呢？除咗有賴健身之外，就係全靠佢嘅私伙健身道具──美國製造、價值幾萬銀嘅Cannondale單車喇。平時佢好鍾意一個人喺中環踩單車，仲戴晒鴨嘴帽同口罩，費事俾人認到。本周二（19號）下晝五點幾，身穿平民風褸襯白波鞋嘅星爺又去到中環都爹利街一帶踩單車做運動。
當時星爺以例牌蒙面look示人，仲以風褸帽笠住cap帽，淨係露出對眼，不過仍然俾記者一眼認出。點知星爺離遠見到記者，即時就Uturn掟彎掉頭鬆人。
運愛車返內地
其實星爺早排去寧波拍新戲《長江七號》嗰陣，每日開工前都會踩一粒鐘單車，雖則喺內地買部單車只係幾嚿水，不過佢都情願千里迢迢由香港運架私家車去當地。雖然星爺身家豐厚，但佢份人好精打細算，估唔到竟然捨得大嗱嗱攞幾萬銀買呢部名牌單車。個人喜好呢家嘢，真係估佢唔到㗎。
