蔡一智至襟着長褸
「呢件褸我喺日本買嘅，呢款褸其實係好傳統嘅款式，咁多年嚟喺時裝界都會興，所以我覺得好有代表性，會係一個fashionicon。呢款褸又可以改善身形，就算矮都變得好高。我屋企有幾件呢啲褸，唔同顏色都有，包括黑、白、灰。」
周麗淇耀眼十字架
「呢條鑽石十字架頸鏈係我第一條擁有嘅十字架頸鏈，要成萬幾蚊，之前一直搵唔到心水，直到畀我發現呢條。我覺得呢條頸鏈真係好靚，仲有鑽石喺上面，無論出街或去隆重場合都啱戴，可謂一舉兩得。」
蔡一傑寸爆太陽鏡
「上一次我去日本嘅時候，行過一間舖頭見到呢副眼鏡，嗰間舖頭嘅眼鏡唔多，而且都係得好少款式。呢款眼鏡望落真係寸爆，戴咗一定好搶鏡，太陽眼鏡好少有呢啲款，個眼鏡形好流線型，個鏡面唔太大，又唔太細，啱啱好，我本身唔多戴太陽眼鏡，所以遇啱就即刻買。」
關楚耀百搭幼布呔
「呢條呔係生日時朋友送嘅，我好鍾意㗎。其實屋企有好多呢一類型嘅呔，不過我特別鍾意幼嘅嘢，而且呢條呔好型，上面仲有啲音符花紋，啱晒我。我發現佢算係百搭嘅配飾，無論着得斯文或者causal都襯得到，所以我屋企仲有條皮質哋嘅幼呔，又有唔同顏色嘅。」
採訪：王連連、駱華齡
