聖誕佳節，每個人總希望可以從自己心愛嘅人身上感受真正嘅溫暖。但無論你係單身、正在等待投入一段新戀情、熱戀中抑或係已婚或離婚，有靚仔祖廸羅（JudeLaw）、靚女金美侖戴雅絲（CameronDiaz）、琦溫絲莉（KateWinslate）同搞笑高手積比伯克（JackBlack）主演嘅浪漫愛情喜劇《緣份精華遊》（TheHoliday）必定能夠令你暖在心頭。 撰文：戶川淳
下月4日正式喺本地上映嘅《緣份精華遊》，單睇卡士，有美國嘅金美侖戴雅絲、積比伯克，英國嘅祖廸羅同琦溫絲莉，故事背景仲要設定喺英倫同美國加州，明顯係要取悅晒英、美觀眾嘅電影，不過，都一樣係好大路嘅愛情喜劇。
聖誕節轉運新招
肥溫同金美侖飾演一對素未謀面，但同樣渴望真愛嘅英、美女子，佢哋喺網上結緣，仲決心趁假期來一個大改變，交換居所度過聖誕節，希望轉轉地方，改改運。
兩個情場失意嘅女人本來誓要脫離男人，但正所謂情來沒法擋，佢哋唔止到異地換屋，仲喺聖誕節換來一段新戀情。
好多外國影迷覺得金美侖同祖廸羅呢一對，竟然唔及肥溫同肥仔積比伯克呢對吸引同有共鳴，演技同搞笑技巧非常出位嘅積比伯克今次仲扮成電影作曲家，一定令人捧腹大笑。
網上取材有料到
呢套愛情喜劇以「換屋」為故事概念，拍過《偷聽女人心》（WhatWomenWant）同《玩轉男人心》（Something'sGottaGive）嘅導演蘭茜美雅絲（NancyMeyers）講及故事靈感時好雀躍咁話：「其實當時我只想為自己計劃一個特別的假期，於是上網想找些旅遊資料，但竟被我發現原來網上有些替人交換家居的服務，我沒有想過世界上竟會有這樣的東西。我在那個網站上看到很多其他美麗的屋，後來才明白原來我要用自己的和別人交換，但感覺很新鮮。」
不過，如果入場要感覺一份如夢如幻嘅浪漫情懷，大家必定要先忘記祖廸羅曾經玩過換妻，又搞過照顧仔女嘅保母呢啲不良嘅紀錄。
筍盤大比拼
「屋」係呢部電影其中一個重要元素，導演蘭茜對「屋」嘅選擇非常講究，拍攝地點橫跨洛杉磯同英國。電影喺加州拍攝嘅外景部份綠草如茵，有比較溫暖嘅感覺。相反，英國拍攝嘅部份，因為係落雪季節，到處白濛濛，感覺比較冷。
但到咗室內，卻剛好相反。肥溫喺英國嘅小屋，室內充滿咗色彩繽紛嘅布置，感覺比較溫暖，而金美侖嘅大屋雖然非常時尚簡潔，顏色卻比較單調。這正好反映兩個人嘅性格，佢哋之後玩換屋，仲對佢哋嘅心情遭遇有好大影響。