聽日係平安夜，祝各位讀者聖誕快樂，贏錢贏到開晒巷。
意甲踢埋今日就歇冬，最差嗰隊係仲未開到齋嘅阿斯科利莫屬。佢哋攻守都弱，後防經常失埋啲大意波，仲係意甲入球最少嗰隊，長買佢對家一定有利可圖。
今場對手基爾禾，自從由廸尼利接手後已漸見起色，近6場之中擊敗過烏甸尼斯、利禾奴同里賈納，淨輸過畀費倫天拿。雖然基爾禾至今作客只贏過1場，但論近況、狀態同鬥志，肯定都好過阿斯科利。今場開平手盤，一定捧基爾禾啦！
曼聯客W可突「維」
英超開快車，今晚我揀維拉對曼聯。維拉近期明顯無季初咁好，已連續6場未贏過，近況不濟主要係後防線失準，近6場失咗9球，前線把握力又弱。呢場對手曼聯上周雖然畀韋斯咸中止聯賽12連不敗，但「紅魔鬼」今季作客特別醒神，9場波贏咗7場，勝出率有接近八成，係𠵱家英超嘅「作客王」。再者近13年兩隊29次碰頭，都係曼聯佔盡優勢，攞到21勝6和2負，今場梗係信近期狀態同數據，揀曼聯客W啦！
阿鵬
有線球彩台主持
電郵：[email protected]