跑馬有歇暑，足球則有歇冬，但香港球迷睇波涉獵歐洲各大聯賽，現在只是德甲休戰而已，由聖誕到新年，仍有大把賽事，實在不愁寂寞也。而跑馬也有所謂的「火雞馬」，足球可有類似的「火雞波」呢?
「火雞馬」實乃投注者的主觀願望投射，亦是一個營造氣氛、帶起話題之術語。佳節當前，人人都想贏錢應付消費，上風馬順利贏出，受惠者較多，就當聖誕禮物好了。
英國人食火雞是否比德國人、西班牙人多不得而知，但老友教路，「火雞波」要向英超尋，睇睇今日的賽程，阿仙奴雖然是跌watt大的球會，但對倒數第5的布力般，而且還是主場賽事，應該仍有很大優勢吧；另一邊廂利物浦對屈福特，更是三甲對榜末呢！
願曼聯車仔派禮物
至於曼聯與車路士的兩場，形勢雖然冇咁一面倒，但爭緊榜首之位，分分要緊，應該不易再爆冷吧。舊年聖誕拆禮物日，這兩支「超班馬」齊齊贏波，今年希望佢哋早點送上禮物啦。
張美德
記者出身的著名馬評人，現職馬會節目主持人。