前保安局局長葉劉淑儀磨拳擦掌準備出選立法會，佢創辦嘅匯賢智庫近日招兵買馬準備搞地區工作，葉劉做官時曾任地區民政專員，深明地區工作做得紮實好緊要，因此早前就特別同一班fans開派對預祝生日，由於參加者眾，仲要搞足兩日，聽起嚟都幾巴閉。
據了解，派對喺一個私人會所舉行，參加者要自己科水畀約100蚊入場費，當中唔少係匯賢之友，即係無正式加入智庫，但對同葉劉交朋友好有興趣嘅人。當日節目都幾豐富，有抽獎又有餐食，女主人一身紅衣亮相，不時過枱同新知舊雨寒暄，非常識做。
匯賢智庫成立無耐，呢次應該係首次聯誼活動，葉劉想參選，日後應該陸續有來。今個聖誕節葉劉囡囡會由美國返港探佢，佢早就推晒大部份約會專心陪女，過個溫馨聖誕。