港股噚日喺中移動（941）帶動反彈，和記電訊（2332）印度業務連Vodafone都有興趣，獲高價洽購，同樣係高增長國家嘅中國，擁有電訊資產的公司自然被好友借勢炒上去，搞到中移動急彈2%。
圖表上，中移動昨已升穿20日線及剛好升上50日線，今個星期出現20日線跌穿50日線的「死亡交叉」，莫非係引淡友入局嘅陷阱？𠵱家兩大藍籌只得滙控（005）圖表比較差，得一隻大笨象弱勢，或未必夠力推跌個市。
油價續升嘅情況下，中油香港（135）高開，即時掃入都有唔錯利潤，短期目標4.27元，到位先沽一半，破唔到頂就可能先出現整固。中國交通建設（1800）唔算開得好高，亦按策略買入，睇呢隻股嘅買賣盤路幾有趣，澳洲佬成朝喺度收貨，責住球幾貨又逐少逐少買盤擺出嚟買，做到咁明顯咪仲難收貨？
重見上市高位無難度
中交噚日出咗11隻輪，澳洲佬佔當中3隻，其中2隻價內，一隻貼價，即係話一定要買足貨對沖，講成交則以比聯最高，但係反而唔見太多比聯露牌買貨。中交嚟緊好消息仲有入MSCI指數，另外，呢隻市值咁大嘅股票，入H指成份股係遲早嘅事，聖誕假後要見番上市高位7.80元應唔會太難。
趙飛雲