雲南一級特產王兟離開咗超人檔TOM仔之後，除咗知道佢入咗TPG（德州太平洋）同埋返老家搞煤炭（即係273威利）之外，成年都冇蒲過頭，之不過佢好似漆黑中嘅螢火蟲，就算幾「低調」，一街嘅人都知佢做緊乜！
噚日，TPG出咗份新聞稿，話兟哥仔響10月嗰陣一手搞掂單刁，用2150萬美金入股越南電訊公司FPT6%股權，而FPT今個月13號響胡志明交易所上市，首個交易日市值就有成15億美金，TPG嘅投資咁就升咗4倍，一個星期後，FPT市值仲升到19億美金，成為當地最大市值上市公司．．．．．．估唔到原來越南比雲南，對兟哥更「老嚟」，唔信？睇睇隻273股價就會明白！
講開TPG，佢就係舊年想私有化李家二少澤楷新加坡檔盈拓PCRD嗰間私募基金，而6月嗰陣同麥格理爭8號仔嘅新橋，咪就係佢個仔囉──原來札肉檬粉，仲正過海南雞飯，相信兟哥都估唔到！