港股前晚喺高位反反覆覆，炒作藉口都係「三幅被」，幾個主要指數最後無大變化，啲成交就縮咗，聖誕假逼近，有假期氣氛沖旺吓個市，唔使股民咁緊張都係好事。
港股昨日走勢都差唔多，又係反反覆覆，恒指跌17點，成交只有463.8億元，炒家都重係追住啲H股嚟炒，H指再升69點收市，又創新高。
睇嚟昨晚美股都唔會有乜嘢大變動，要睇就睇住㗎仔個市，如果㗎仔唔大幅抽上去，港股今日唔會有乜嘢大作為，但係都係一個好消息，因為啲國企股可以繼續炒。
𠵱家揀股炒好似好難，但係又好似好簡單，唔係炒國內銀行股就係炒保險股，一係一齊升，一係輪流帶H股指數升上去，保險股勁升咗幾日，啱啱開始唞，國內銀行股又接力炒上去，昨日嘅情況已經好清晰，呢兩日都係繼續炒銀行股C輪，但係要睇實啲保險股，整固得差唔多，又可以選擇性吸納。
招行C輪4828：招行（3968）昨收16.22元，突破阻力位，仲加多個「黃金交叉」，成交連續第2日上升，呢隻股嘅特性係即市走勢好飄，但炒上個陣就好狠，舞上去好多時追都追唔切，即市震倉時又會嚇得你好驚，但係只要每次小注買入，收市前先加注，咁就唔驚俾佢震走，短線股價可升破17元，破位睇18.50元。招行C輪4828昨收1.72元，槓桿率9.4倍（有效5.6倍），對沖值0.59，引伸波幅配合正股升勢回升至35.2%，有利升勢，正股升上17元，4828會見到2.20元，正股升上18.50元，隻輪唔會低過3.25元，呢個價買，正股跌穿15.60元止蝕。
俊 樺