瑞信亞洲區首席經濟學家陶冬，噚日舉行每季一次嘅記者會，講到最近港股熾熱情況。佢認為，港股未算出現泡沫，因為市盈率比其他市場唔算特別高，但的確有啲擔心，點解？佢話竟然「連出租車司機、賣報紙阿嬸都問我stocktips（股票貼士）」；仲有啲專業嘅機構投資者，連基本研究都唔做，唔理三七二十一就買新股，搞到佢對股市起咗警戒心。
同樣，內地股市亦活躍起嚟，總值15萬億元人民幣嘅存款儲備，面對幾近於零嘅存款利息，正蜂湧到股市，好似最近內地有隻股票基金集資，竟然一日內籌集到400億，佢話係過去13年環球金融界前所未見；過去四星期內地基金嘅集資規模已經去到千二億。
雖然中港兩地股市都咁熱，但如果明年有乜冬瓜豆腐突發事件發生，佢睇好內地嘅抗跌力會好過港股，因為香港冇外滙管制，熱錢可以匆匆來匆匆去，令港股大起大落，但大陸因有資本賬管制，影響自然會較小。
手機響聲激死人
陶冬噚日由美國經濟講到亞洲、中國同香港，足足講咗成粒鐘，為免俾中途打斷思路，佢已向華華同埋啲行家事先聲明，要求大家熄電話或者轉震機，點知有位電視台工作人員嘅手機兩次響起，激到佢話如果對方唔熄機，佢就唔再講落去；點知臨到結尾，再有電話鈴聲響起，今次唔係其他人，而係輪到佢自己個手機響！佢都好唔好意思，向大家道歉。
[email protected]