新樓貴到冇譜，究竟值唔值？真係應咗一句「願者上釣」。
好似土瓜灣啲新樓盤咁，閒閒地賣到五六千蚊呎，咁同區樓又值幾多呢？十零年嘅樓一般都係3000零蚊呎，去到接近20年嘅樓，2000零蚊有交易，好似座落炮仗街嘅新城中心咁，19年樓，三四百呎單位，唔使100萬銀，香港置業陳煒鈞話，啱啱做咗單3座高層D室成交，433呎，樓價盛惠88萬8，夠晒好意頭，呎價2051蚊。
新城中心有4座，座落喺機場隧道入口附近，單位面積305至476呎，實用率七成幾，講內櫳空間，同𠵱家啲新樓500零呎單位差唔多。以前啲唔實用嘅樓，都比𠵱家啲大型屋苑好用，但係新樓就愈賣愈貴，班發展商真係神乎其技。