聽日就係平安夜,仲未訂到位食大餐嘅話,不如試吓被睇漏眼嘅消夜自助餐!日航酒店喺呢個蟹肉當造期推出蟹宴消夜自助餐,用上肉嫩、膏香、蟹子多的阿拉斯加皇后蟹,創出多款新穎菜式。其中首推甘香濃郁的蟹子海參炒飯,蟹迷一定過足癮!據聞還有少量位,快啲把握最後機會訂位喇!
記者:林思樂
攝影:譚盈傑
蟹子海參炒飯
蟹子蟹膏用料十足,每粒飯都吸咗蟹油香。一啖飯之中,蟹膏綿、蟹肉鮮、蟹子脆、海參滑、蘆笋爽、口感非常豐富!
冬天正是食蟹嘅好季節,蟹肉特別肥美,因此日航酒店特別推出蟹宴消夜自助餐,採用來自加拿大的阿拉斯加皇后蟹。這種蟹產於不受環境污染的北極水域,肉質特別鮮嫩,而且特別揀選皇后蟹,即是雌蟹,皆因雌蟹的蟹膏特別甘香,蟹子零舍豐滿,結合蟹肉、蟹膏、蟹子可做出更多不同菜式,創造更豐富的口感。
鹹甜味
鹹甜味道大混和
今次蟹宴主打創意新菜式,當然唔止蒸炒咁簡單,大廚話:「我哋做了不同的鹹甜點及冷熱盤,但係蟹的鮮味唔係樣樣食材都配合到,所以我哋喺醬汁同配料方面落咗好多工夫。」新菜式中有日式飯、中式炒腸粉、炒飯、牛奶粥,甚至西式的蟹皇撻和蟹肉芝士餅,果然配搭新奇,其他地方食唔到,蟹迷唔可以錯過。
加料加時到1點
呢個蟹宴自助餐逢星期五、六及公眾假期前夕於雅樂吧供應,但平安夜同除夕就特別推遲至凌晨一點,等大家可以邊食蟹邊倒數,而且更會改在地方更寬敞的日航咖啡室,食物亦會加料,等大家可以玩得盡興!
阿拉斯加皇后蟹肉粥
睇個賣相白雪雪就知係唔同一般嘅蟹皇粥。先用蟹殼、蟹箝、魚骨煲粥三、四個鐘,再抽起啲材料,特別加入牛奶,零舍清淡香滑,最後加上蟹肉,即鮮甜又軟滑。
蝦兵蟹醬炒腸粉
重點在於醬汁,用咗瑤柱、火腿、蝦醬、辣油再加秘製醬油煮個多小時而成,非常惹味!腸粉先煎至金黃色再配埋蝦亁、芽菜及甜豆炒香,外脆內滑。
迷你雜菜蟹皇撻
蟹肉配合西式鹹點,創意十足,鹹忌廉由蟹肉、亁葱、白酒、番茄煮成,忌廉軟滑之中帶有蟹的鮮味。
蟹肉芝士餅
大廚特別選用芝士味濃郁的紐約芝士餅,上面再放混咗呍呢拿汁的蟹肉和蟹子,味道與芝士餅出奇地配合,咁新嘅配搭,芝士餅迷必試!
雌蟹較罕有
阿拉斯加蟹又稱雪蟹(SnowCrab),產於阿拉斯加水域,在阿拉斯加蟹類捕撈量之中佔最多。雪蟹可分為灰眼雪蟹(ChionoecetesOpilio)和紅眼雪蟹(ChionoecetesBairdi),灰眼雪蟹的體積較小,平均約重1公斤,紅眼雪蟹體積則較大,平均約重2公斤。灰眼雪蟹是目前產量最豐富,在北大西洋和北太平洋水域都可捕撈,通常只捕撈雄蟹,所以今次蟹宴消夜自助餐選用雌蟹,實屬珍貴罕有。
食神評級(以5個★為滿分)
味道︰★★★★
服務︰★★★
環境︰★★1/2
價錢︰★★★★
讚:阿拉斯加皇后蟹用料十足,菜式創新特別,其他地方食唔到,平安夜同除夕都係二百幾蚊位,算抵食。
彈:話明係蟹宴,但只有6道蟹菜,略嫌選擇較少。
香港日航酒店(23134210)
地址:尖沙嘴麼地道72號香港日航酒店雅樂吧(平安夜及除夕設於日航咖啡室)
時間:星期五、六及公眾假期前夕9:30pm-11:30pm;平安夜及除夕11pm-1am
座位:雅樂吧70個、日航咖啡室150個
收費:
星期五、六及公眾假期前夕
成人$148/位 小童$98/位;
平安夜及除夕
成人$268/位 小童$208/位