建築邦平時鍾意去沙田馬會食飯，凱旋廳係佢飯堂，乜唔係啫，馬會唔用味精，夠健康，食後唔會喉亁；停車場免費，餐廳冇加一小賬，冇茶芥，年中慳番唔少，價錢喎，你估啲名氣食肆唔貴呀？不過因為位於沙田，好多市區親朋嫌遠，唔肯去。
有時食得多，未免有人覺得要試試新意思，於是建築邦上星期六，一家二十四口預訂一間旺角有名食店，講明兩張大枱，要一間房，食店話：「要房有最低消費，三千幾蚊一圍。」建築邦等人話要訂兩圍，菜價照寫三千幾，冇所謂之至。然後食店話間房已有人卜咗，堂吃就有枱，於是一言為定，叫部長寫定佢哋啲出名小菜。
好嘞，上星期六，七點半成家去到，全店滿座，只有一張吉枱，就係建築邦家人訂嘅。二十四人點坐得落呀？經理大大聲話：「對唔住，隔籬張枱話喺八點就埋單㗎嘞。」隔籬枱食客立即反駁：「你幾時叫過我哋八點埋單呀，我哋係唔走住。」於是僵晒，成班人等咗四十五分鐘，先至可以全部坐低。邦太曾經想話拉隊走，仲俾經理笑：「呢個時間，度度冇位，走得去邊呀？」
未食已經一肚氣，食食吓，睇吓張菜單，發覺只有七款，弊，寫菜唔係六款就係八款咁啦，邊度會有七款㗎？經理此時亦都發覺，立即細細聲講：「對唔住，我哋加送一款小菜。」加菜都冇用啦，每碟菜式都唔似得馬會凱旋廳咁大碟，啲第三代大細路唔夠食。邦太突然發覺，送入房間嘅西蘭花帶子特別大碟，比建築邦佢哋所食嘅西蘭花帶子大成倍。邦太立即質問夥計，夥計話：「人哋食六千幾蚊一圍㗎！」
埋單花咗七千幾八千，加埋停車場費與食到一肚氣，實際成本貴過馬會。建築邦話過以後都係盡量要去沙田馬會食。同樣價錢，喺凱旋廳係食得好舒服，起碼唔會俾人窒到有氣冇碇唞啦。呢間食店今時今日嘅服務態度不及劉德華廣告，點解會咁旺呢？食勻油尖旺嘅刁嘴秘書Ｖ話：「呢間以蝦多士著名，炸子雞都唔錯，其他都係一般啫，三至四人在內食小菜就幾好，食一兩圍，如果帶埋老人家與細路，梗係唔去啦。不過，好多人都唔係馬會會員，唯有去受吓氣！」