廣深鐵路A股（601333）噚日掛牌表現唔差得過北京大唐A股（601991），股價早段一開市就升逾7成，收市升64%，收報6.17元人民幣，廣深鐵H股（525）卻見有獲利回吐，跌3.2%，收4.80元，比A股折讓超過兩成。A股呢個升幅，相信已經出乎市場預期好多，尤其係廣深鐵A股發行量多過H股，唔同大唐有發行量少貨疏嘅情況。
呢個H股回歸國內發A股嘅熱潮，相信仲會維持一段時間，起碼等國壽（2628）同埋平保（2318）發完A股先至會冷靜落嚟。試諗吓連呢隻國企之中嘅悶股廣深鐵，A股掛牌都可以升咁多，就知道國內A股幾咁狂熱，國壽A股掛牌隨時升到你唔信。
中信資源（1205）靜咗一輪之後，噚日大陽燭爆上，升7.6%，成交大增至57球。哈薩克斯坦總統19至23日訪華，據國內報章報道，中哈雙方已就建設石油管道二期，喺周四達成協議。
至於搞咗好耐，由中信集團向加拿大收購Karazhanbas油氣田嘅計劃，暫時仲未有新聞出現，由於中信管理層已經話咗唔介意同其他公司共同分享呢個油氣田開發計劃，故此當中仲有乜嘢未傾成，可能會係涉及哈國向中信回購番幾多油氣田嘅股份，講緊細節而已。中信資源股價都插咗兩日，噚日抽返晒上去，單嘢或有眉目都唔定。
歐陽風