聖誕、新年假期，好多人都會過大海旅遊度假兼博番鋪，問何生攞番啲假日使費。
不過，《UWANTS.COM》討論區會員「猿人」過大海手風就唔係好順，但有賭未為輸，碌卡換籌碼再賭過，但碌完佢先問：「我有滙豐、渣打及中銀creditcard，每張喺澳門賭場簽咗1000蚊卡數，到收月結單時，總數會收幾多？」
多數銀行當零售簽賬
究竟碌卡換籌碼算係現金透支，抑或零售消費？網友「原始人」話：「銀行會當你提取現金，即時計息……」
本欄特此向大新、永亨、恒生等銀行查詢過，佢哋都回覆話，喺賭場碌卡換籌碼，銀行只會當係零售簽賬。至於猿人所用嘅滙豐信用卡，同樣係只會當係零售簽賬。
中銀視作海外透支
不過，恒生就回覆話，要視乎賭場同收單銀行之間嘅協議，睇吓點樣界定「碌卡換籌碼」，係咪現金透支，要視乎個別情况，唔能夠一概而論喎。只有中銀最辣，碌卡換籌碼會當係海外現金透支，除咗要收現金透支息率，仲要收簽賬額4%，再另加20蚊手續費。
讀者過時過節去澳門賭場碰運氣，千祈要量力而為，記住「小賭怡情，大賭亂性」。