唔係每個月狂追《Popeye》、《Boom》、《mono》等等日本雜誌就叫做「潮人」，計我話真正嘅「潮」係應該發自內心，應該站喺潮流之先，而唔係盲從附和！今個聖誕我哋就請到一班活躍於香港潮流名氣界的潮人icon，為大家剖白今年最想收到嘅聖誕禮物，內容千奇百怪，好多你估都估唔到！
記者：羅灝汶 攝影：陳偉強、楊錦文、陳盛臣
李璨琛
（電視電影潮流人）
「最想要嘅聖誕禮物係剛剛推出嘅BenQDP303100GB移動硬碟，因為我經常周圍去，有時自己拍低一啲旅行短片、相片等等都唔夠容量存放，所以呢部機好啱心水，加上我唔想下下用i-PodSave資料，始終將音樂同資料分開處理會更有條理。」
森美（資深電台DJ）
「我最想要嘅聖誕禮物係星星投射機，可以將屋企變成滿天都係星，如果有女朋友更加可以同佢一齊睇流星許願，最正係有無數流星不停放送，咁就唔怕許唔切願啦。」
卓韻芝（電台DJ兼媒體創作人）
「聖誕禮物當然最緊要有心思啦，我自己就去咗美國MOMA博物館OnlineShop訂咗兩樣禮物畀自己，分別係磁石戒指同彩虹製造機。前者可以將不同金屬嘅物件配上戒指，而且設計概念來自「EverTogether」，好鬼窩心！另外彩虹製造機就可以放喺窗邊，咁就會製造出彩虹喇！」
以下網址有售： http://www.momastore.org
黃偉文（著名媒體創作人）
「自古每人收到一份聖誕禮物，都只有一剎那嘅驚喜，一拆開之後就冇晒神秘感，所以我今年最想收到一張A380嘅機票，因為A380客機要下年10月先投入服務，如果我可以𠵱家收到呢份禮物，就可以畀我興奮十個月，冇一份禮物比佢更有意思。」
郭慧（潮店DeepAnger老闆娘）
「我先生阿Ben（DeepAnger創辦人）知道我好鍾意熊仔，早前就設計了一隻純銀熊仔畀我，好多朋友見到都話勁鍾意，所以就開始推出銀器熊仔系列，最估唔到係今年我又收到全新純銀熊仔禮物，感覺勁Warm又Surprise！咁我就提議將佢放落舖賣，就連方力申、阿嬌都買咗隻。」
Eric（古着店美華氏主腦）
「我最想要嘅聖誕禮物係一件古着迷夢幻之物：美國空軍G1Size40號嘅50年代皮褸。古着要真正Vintage又有好Condition，好罕有！雖然我喺店舖工作十年，不過一直都遇唔到呢一件褸，絕對可遇不可求，有錢都買唔到，而舖內最接近「完美」嘅皮褸就只有一件，不過都唔係我杯茶。」
阿仔（I.T時裝店公關）
「我自問唔係一個遊戲機狂熱分子，不過PS3又真係好吸引；畫面靚之餘，像真度又極高，不過我只鍾情賽車Game，所以要我用幾千蚊買部PS3就好唔抵，好彩我阿哥買了部，不過就欠咗隻《RidgeRacer7》，有人送畀我就好喇！」
LeeHawk（DoublePark時裝Buyer）
「對於住喺新界區嘅我，單車絕對係我嘅必需品，我一直用緊一架20吋長嘅單車，現時好想試吓玩專業單車，呢架由GregLemond推出嘅單車，就係我DreamCar；外形靚仔又實用！」
以下網址有售： http://www.hkbicycle.com.hk
Cody（潮舖day主腦人）
「上個月我睇到《蘋果》一篇報道，見到一個名為Ceci嘅『爛燈泡』，好得意！係荷蘭設計師DaveKeune同SanderMulder嘅作品，將一個燈泡設計成「糜爛」Look，好有Feel。」
Brian（板舖852主腦人）
「我好想要一部24吋G5Mac機，外形真係贏晒，而且我工作上經常要設計不同圖案，呢部Mac機，一定係必需品。」
MichaelLau（著名Figure設計師）
「只要可以離開香港就係一份最好嘅聖誕禮物，所以雙人來回日本機票連住宿，就一定係我最想要嘅大禮，聖誕節可以去日本同愛人賞櫻花，絕對係正啦！我一離開香港就可以放低所有工作冇晒煩惱。」
鐵人兄弟（玩具設計師）
Winson：「我好想要PS3，打咗幾十年機，PS3真係好終極，可惜我仲未入手。」
William：「最新李小龍12"Figure，真係超級像真，係作為一個小龍迷必儲嘅項目，難怪賣成二千幾。」
Kenny：「今年我嘅聖誕禮物已經到手，就係內子送嘅超舒適工作椅，佢唔想畀我知邊度買，所以不能提供店舖，只知佢喺灣仔買。」
