冬大過年！中國人傳統今晚點都要一家人齊齊整整食餐好！出街爭崩頭？屋企開爐開鑊做場大龍鳳？苦了自己又苦了煮飯嗰個。近年好多人都會為方便揀食盆菜，不過大部份都要幾日前預訂，規矩多多，但翠亨邨有個即叫即做聚寶盆菜，今日冬至、今日LastCall，忽然挑起條筋想食盆菜？3點前落Order，快！
記者：朱崇德
攝影：譚盈傑
盆菜發源自北部圍村
具有幾十年中廚經驗、現職翠亨邨總店大廚嘅關志強師傅講盆菜：「盆菜原本係元朗、大埔一帶圍村嘅『地方菜』，係呢十幾年先喺香港興起，不過近兩、三年，每逢過時過節好多人都鍾意外賣返屋企，貪方便唔使煮，亦唔使出街同人逼嘛！」
盆菜好似點都走唔開雞、鴨、鵝、豬皮、蘿蔔、魚球呢類中堅配料，今日介紹呢幾個，又龍蝦海鮮、又江蘇八寶鴨，真係幾破格兼反傳統；「後生一輩食盆菜可能有個誤解，以為多數要座爐而食，其實傳統嘅應該係熱辣辣用木盆而出；可能近年多咗人食外賣盆菜，座爐而食只是一種翻熱作用！」市場所見，好多外賣盆菜多數用鐵盆、瓦罉，翠亨邨呢個聚寶盆菜，用到半吋厚身砂鍋，都真係幾落重本；厚身砂鍋受熱均勻又保溫，食落當然好味啲！
海龍盆中霸$1,280/6位用
原隻龍蝦做盆菜，創新之餘仲幾咁豪氣，阿廚話唔足1.5斤包退貨，其他配料主要都係海上鮮，好似大肉蟹、帶子、美國螺片等，我愛死個螺片，夠大塊之餘又爽口兼夾脆，絕對係上等貨。另外要一提係個海中蝦，用上12隻1斤嘅貨色，齋食海鮮已值回票價；煲底配菜非常特別，並非一般豬皮蘿蔔，食時發現用上生炒糯米飯，海鮮汁完全滲透，鮮味更上一層樓。
藏寶全鴨盆菜$880/6位用
以江蘇傳統名菜八寶鴨Crossover做粵式盆菜，亦是前所未聞；去晒骨嘅「布袋鴨」狂塞蓮子、蛋黃、雲腿、百靈菇及亁百合等香口材料，煲面放滿沙井蠔、海參、日本中谷瑤柱、鮑魚、冬菇等，濃重的鴨味混和海味已經香到無倫，海味鮮味又滲入鴨身，內外一逼，比傳統八寶鴨真係更和味。
八素蔬盆菜$380/6位用
食得盆菜，多數都係啖啖肉！整個全素盆菜，一來為咗畀食齋人士一樣可以享受圍爐而食的樂趣，更重要者，係可以做埋其他盆菜嘅「配菜」！用料包括有竹笙、珍珠笋、齋鴨肫、髮菜、冬瓜環、鮑魚菇、素鵝、酸齋、大豆芽等，芡汁味道清淡，食落夠健康。
食神評級（5＊為滿分）
食物︰＊＊＊＊
環境︰＊＊＊
服務︰＊＊＊＊
價錢：＊＊＊
讚：唔係講風涼說話！叫親盆菜都係鮑參翅肚，實在冇乜變化，海龍盆、八寶鴨豪得嚟有變化，做盆菜味道又夾，抵讚！
彈：價錢貴唔貴真係幾主觀，用料味道感覺係值嘅；不過成千蚊買個盆菜，好似貴咗啲。
阿廚提提你
個海龍盆中霸係用料最貴嘅一盆，全部生猛海上鮮整，絕對值回票價，同八素蔬盆菜一樣，即日訂大概45分鐘可以做起，電話預訂唔使等可以即刻嚟攞！至於個藏寶全鴨盆菜就係最花工夫嘅一個，不過味道非常夾，電話訂都需要3個小時前，想6點零開飯？最好2、3點訂定先！
冬至搵食
翠亨邨（23762882）
地址：尖沙嘴彌敦道132-134號美麗華商場地下
座位：約400個
營業時間：星期一至六11:30am-11:30pm；星期日及公眾假期10:00am-11:30pm
