理財信箱成日教人點樣將積蓄「發大」，最常用嘅係叫人去買基金，網友Wilson_ky喺《香港討論區》問：「如果有現金10萬，買邊隻股票可以在半年內變成20萬？」佢仲講明叫大家唔好當講笑，因為半年後要用錢，儲蓄又趕唔切。
小心財不入急門
不過，其他網友又點會唔當講笑，SHAW叫佢：「買張船ticket過金沙玩鋪大細。」goranwong就提議「去買六合彩，頭獎4500萬」。Lscat答案似樣啲，但跟唔過，因為佢話：「炒孖展或輪，不過會輸死人。」
Planetfootball就話玩外滙，「10萬英鎊=20萬美金」，都係講笑！
雖然其他網友好似講笑，但半年之內要將投資盈利翻一番，要承受極大風險，與賭博無異。星斗屎文提議買滙豐升輪，但阿里ALI就提醒Wilson_ky：「財不入急門……玩輪？輸多贏少。」