楊思琦是圈中出名的日本菜迷，可以餐餐三文魚撈飯，適逢聖誕節，思琦當然渴望擦番餐日本聖誕大餐。可惜日本的傳統習俗對聖誕節不大重視，所以唔會有一些特定的聖誕美食，又或者唔似得外國流行食火雞，既然係咁，思琦話不如親手整番盤充滿聖誕氣氛嘅壽司魚生拼盤，過吓手癮都好！
記者：趙珮倩 攝影：何家亮
鳴謝：日宇師傅、文師傅
雪人壽司魚生拼盤
需時︰40分鐘
價錢：$100/5人
材料：日本秋田米1公斤、壽司醋200毫升、昆布1塊、甘笋/紫菜少許、三文魚/吞拿魚/甜蝦/墨魚各2至3片、水適量
做法：洗好米，加入1:1份量的米和水，面層放上1塊昆布。待煲好飯後焗8分鐘，拿走昆布，飯攤平放通風處，趁飯熱加入壽司醋，拌勻待涼。握壽司之前，雙手沾上混合了1:10份量的醋和水，1將飯搓成一大一小的圓形，2三文魚切幼條圍在雪人的頸上；以少許紫菜做成眼睛、甘笋做鼻、3吞拿魚做帽。最後按個人喜好放入其他魚生做成拼盤即成。
鵝肝拌酸梅醬生鴨胸
需時：20分鐘
價錢：$25/1件
材料：鵝肝10g、鴨胸1件、日本紅梅1粒剁碎、餃子皮1塊、大葱絲/黑椒/鹽/生粉各少許、油適量
汁料：日本豉油/味醂/酒各45毫升
做法：鵝肝醃上黑椒、鹽及生粉，炸至金黃備用；鴨胸煎至半熟，隔油待冷，放在已煮熱的汁料浸13分鐘至入味；餃子皮炸至金黃，放上鴨胸，鋪上紅梅碎，再加上鵝肝，淋上汁料，最後放大葱絲點綴即可。
西京燒羊扒拌青芥醬
需時：30分鐘
價錢：$30/1人
材料：羊扒1件、西京麵豉25g、青芥辣30g、白麵豉30g、清水1碗
醃料：西京麵豉30g、糖/味醂各2茶匙、酒3茶匙、蛋黃1隻
做法：羊扒預先醃好，然後用水洗去扒上的醃料，以中火煎5分鐘至8成熟，把西京麵豉、青芥辣、白麵豉及清水滾起後，淋上羊扒面即成。
角切鐵板和牛粒
需時：10分鐘
價錢：$40/2人
材料：西冷牛扒1塊（切粒）、溶牛油25g、黑椒碎/鹽/蒜片/日本豉油/油各少許
做法：燒熱少許油，牛扒粒落鑊，灑入鹽和黑椒碎，大火炒至5成熟，調細火，倒入豉油、蒜片和溶牛油兜勻，即可上碟。
貼士：使用中的壽司醋飯要用亁淨的濕布蓋住，這樣可保持飯的濕度與溫度，避免飯粒變亁，無法揑成飯糰。
知多啲：昆布是日本人常用來調味的食材，無論煮飯煲湯都鍾意落塊昆布吊味，與中國人習慣落鹽一樣。
飯桶思琦
變色魚生照食
咪睇思琦細細粒、嬌滴滴，查實佢每餐都堅持要食飽飯；鍾意食壽司，正因為有飯到肚，仲要明知食咗會肚痛都唔理喎。「我餐餐都要食飯，如果冇米落肚，會好似冇食過咁嘢；而且壽司好似冇乜油，感覺上健康啲！除咗三文魚，海膽、帶子、赤貝我都鍾意，試過有次，見到啲魚生顏色有啲唔對勁，但都忍唔到口，結果搞到個肚好唔舒服，自此之後一定會揀啲新鮮魚生先會食。」
雖然思琦鍾意食壽司，但從來都懶得自己動手去整，唯一一次整壽司經歷要追溯到中學時代。「有年中學嘅ChristmasParty，易整嘅食物都俾人霸晒，迫住要整壽司，於是我就用青瓜、蟹肉、三文魚、甘笋包壽司，好彩最後都清晒貨啫！平時真係唔會自己整，一來準備工夫好多，淨係壽司飯都有排搞；二來我係唔餓得嘅人，一肚餓就要食，仲邊有心情慢慢整！」
不過今年聖誕，思琦就打算以雪人壽司大宴親朋，「我到時仲會加入炸三文魚皮、蟹子同沙律醬喺雪人入面，爹哋媽咪男朋友，人人有份永不落空！」咁有心思嘅聖誕禮物，冧晒啦！
