又到聖誕，又到聖誕！真係1年容易好快過。星俠在此祝各位股友聖誕愉快，過完平安夜唱完聖詩後，下周三港股重開炒作得心應手。
中交窩輪登場，正股（1800）亦因而炒起。中交上市還未夠兩周，已經可以發輪，較以前已大有「進步」。姑勿論如何，容許發輪，無理由即時通知就立刻發到輪，事前有關方面一定有溝通。星俠懷疑中交上市首日由高位7.80元「撻」至低位報收，會唔會係壓價待窩輪上場時再炒過？
星俠愛股國壽（2628）再創新高，真係心想事成，亦足證A股概念威力強勁，君不見除了國壽，連提出發A股嘅海油服務（2883）及首都機場（694）都爆升！國壽發A股，平保（2318）又話發，剩低嘅中國財險（2328），若市場有人估佢會發A股，亦屬正常之揣測。
全年業績料理想
中財險05年恢復盈利增長，盈利達11.13億元，今年上半年形勢大好，營業額達369億元，純利上升24.8%至11.09億元，上半年純利已接近05年全年水平，按比例計算，相信全年盈利起碼已有23億元，因為內地A股今年大牛市，投資回報應有可觀增長之餘，加上年中內地宣布規定要買汽車第三者責任強制保險，措施等如替中財險開拓生意，經營持續得到良好改善。
中財險股價相比其餘兩大內地保險股，明顯大落後，現價正蓄勢待發，估計突破在即，升破歷史高位3.525元後，上望空間可謂萬里無雲。
方星俠