國際網絡:聖誕雜務外判新錢途

國際網絡:聖誕雜務外判新錢途

由於工作繁忙,美國愈來愈多人請專人籌備過節,例如安裝聖誕裝飾、布置家居、選購和包裝禮物、去郵局代寄速遞,甚至籌劃聖誕派對等,聖誕節工作外判服務應運而生。
midwestmama喺《MSNBC討論區》話,如果有錢都會請人安裝聖誕燈飾,至於買禮物同布置屋企,佢就鍾意自己做番,「有啲人願意請人揸攝錄機,拍攝老婆仔女拆聖誕禮物嘅情況,但我冇諗過咁做。」
Bikerchick就話,唔會將聖誕節嘅雜務外判畀人做,但聽聞有啲慈善機構會幫人包禮物,收番捐款作為代價,咁佢就唔介意畀幾美金請佢哋包禮物。

請人代勞漸成風

Wallyism講,無論自己布置或者請人代勞,佢都好欣賞美輪美奐嘅家居,不過,「我比較喜歡自己郁手布置屋企,享受吓親力親為嘅滿足感。如果要出錢請人做嘢,我就寧願一切從簡,減少無謂嘅工作。」
專門代人籌備過節嘅kwin1120就賣花讚花香,佢話一般人買禮物既嘥時間,又容易買錯嘢,如果請專人代勞,就會買到完美嘅禮物,仲可以有多啲時間做其他事。
喺美國,有人願意畀逾2000美元(逾1.55萬港元)請人為幾千呎嘅大屋安裝同拆除聖誕燈飾。負責呢項外判工作嘅ThePerfectLight燈飾公司,喺侯斯頓有成千個客戶,肯出1000至2.5萬美元請人代勞。