山頂地王四萬二蚊呎價，為香港再創世界紀錄，連一向諗頭多多、得閒就整個「金廁所」同「金馬車」嘅金至尊老闆林世榮都話，真係貴到有啲離譜。不過，咪以為佢好咬牙切齒，實情開心到飛起，事關佢自爆，喺03年沙士樓市低迷時，向四叔李兆基買咗幾個山頂單位，𠵱家樓價升咗成倍，賬面淨賺差唔多2億港銀，豬年未到，先行豬籠入水，同金至尊喺工展會嘅攤檔主題一樣。
賺得咁和味，林世榮竟然話，其實視黃金為糞土，如果唔係都唔開先河，喺紅磡嘅展覽廳整個金廁所喎。佢又話，打理生意忙到抽筋，有澳洲朋友叫佢去玩，叫咗成10年，佢都抽唔到時間，今年終於有機會行開吓，上兩個星期諗住book張四萬蚊嘅頭等機票去探吓澳洲朋友啦，點知好景到爆滿，咁佢惟有視工作為娛樂啦！