長假期臨近並冇令好友放軟手腳，昨日恒指再升97點，升破19300，好友大戶咁勤力，睇怕下禮拜結算前後會掃得仲大力。
大戶已經好有實力，加上個勢贏晒，配合基金年結例行工作，「借力打力」咁殺上去，千祈唔好睇小下禮拜得3個交易日嘅升勢。美股雖未見有大動作，但㗎仔就蠢蠢欲動，成日都想向上拋離17000關，大方向喺19000嗰頭，如果㗎仔下禮拜發力，港股會抽到幾多點？唔好以為呢啲只係一廂情願嘅假設，日經指數昨日已升破17100，大幅抽高一啲都唔奇。
港股昨日貼住阻力位收市，突破呢個水平，下個目標係20000點，下禮拜升到20000點嘅機會唔大，但踏入1月上旬，試20000關嘅機會就唔細。如果大家唔係炒期指，指數抽高幾百點唔係好吸引，但如果短炒國企股同窩輪，恒指炒高幾百點嘅市場氣氛就好有利，大家睇吓昨日啲國企股點炒就知。
招商銀行（3968）走勢好飄，但唔緊要，炒招行C輪，跟足策略做就可以，大戶要炒上，股價隨時絕塵而去，國內銀行同保險股仲係焦點，招行會跟上。
聯通C輪4541：聯通（762）昨收10.56元，股價突破10元後喺高位整固，成交縮咗1日後又再升，追貨盤好似忍唔住，等唔到低位收集，買盤咁積極，短線應該可以上試12元，破位睇13元。聯通C輪4541昨收1.30元，槓桿率8.1倍（有效5.3倍），對沖值0.64，正股升上12同13元，4541應該唔會低過2.30元同3.15元，正股跌穿10元止蝕。
俊樺