泰國軍政府竟然搞一鋪「外滙管制捉放曹」，令到投資者人心大失，世界上好少會有政府在上午死撐外滙管制，到咗下午，居然發表聲明指出股市投資不在管制範圍之內嘅，你估玩泥沙咩。十二月十九日曼谷股市開市後，投資者爭相拋售，指數立即跌咗9%，股市叫停，休息半小時，開番後指數繼續大跌。泰國銀行行長TarisaWatanagase女士認為滙管措施唔會影響外國直接投資，跟住交易所總裁PatareeyaBenjapolchai女士哀求泰國銀行重新考慮，以避免股災。前泰國銀行行長，現財政部長Pridiyathorn見記者，聲言股市下跌係市場之事，滙管措施對舒緩泰銖升值壓力已經有效。佢講完之後，指數下跌18%，財長繼續講嘢：「我哋先講經濟，投資要排第二，政府唔會干預股市。」
嘩嘩嘩，五個鐘頭之內，Ｐ財長完全改變立場，宣布外滙管制不適用於股票投資。不過傷害已成，東南亞、日本與香港股市齊齊大跌。第二日（十二月二十日）先至升番晒，已被斬倉或者被嚇到拚命出貨嘅投資人士，多得泰國財長唔少。
泰國銀行（央行）班技術官僚完全受制於財長，毫無獨立性，於此可見一斑。但財長又聽邊個講呀？左丁山飛電問泰國專家Ｒ，佢話係軍佬逼泰國銀行做啲嘢，未宣布外滙管制之前，已經同索羅斯及美國對沖基金傾過偈，警告佢哋唔好運錢入泰國炒股與炒政府債券，消息又話對沖基金唔聽話，故此出到閂閘打狗呢一招，軍人政府以為咁樣會套牢對沖基金資金，誰不知係食砒霜醫病！搞死自己先，將泰國投資者同樣一棍打死。起初央行企硬，但後來可能當權軍佬見勢色唔對，就叫財長Ｐ自冚兩巴，講番一啲前言不對後語嘅說話。軍人當權，往往以為槍桿子出政治，槍桿子亦可以指揮經濟、投資，殊不知銀彈威力大過炸彈，一日股市蒸發一千七百億港元，乜嘢將軍都唔敢再亂嚟，可惜嘅係泰國銀行班技術專家做晒儍瓜，以後一世俾人笑。