出糧問題一直未解決嘅老牌報章《成報》又有新消息，員工不滿資方年近歲晚，𠵱家仲未有聲氣11月份糧幾時出，因此決定今日開會商討對策，其中有人話，會積極考慮喺傾唔出結果嘅時候，引用僱傭條例第10A，即係話僱主超過一個月唔出糧，就當自動解僱員工，工人可以即時離職兼攞埋僱主一個月代通知金。
據了解，有呢個睇法嘅員工數目都唔少，有啲係對公司心灰意冷，計劃跳槽；有啲諗住轉行；有啲就唔想縱容無良僱主，總之一人有一個理由，所以今日會議都幾關鍵，如果用10A人數多，《成報》運作就會受好大影響，管理層唔好再坐視不理，有心經營就要攞出誠意，唔好淨係得個講字。
據講，《成報》娛樂版近日已經按章工作，包括工作後唔返公司，將稿件傳返公司了事，原因係節省車馬費。搞成咁，資方真係要好好反省對唔對得住班同事。