專責處理爆炸品嘅拆彈專家，每次任務都可以話係搵命嚟博，一個唔小心隨時被炸到粉身碎骨，尤其係幾十年前，科技冇咁先進，拆彈專家所冒嘅生命危險仲大。最近，警隊一位前拆彈專家離世，呢位綽號「轟炸機」嘅NormanHill（圖），可以話係香港警隊拆彈組嘅先驅者。
佢喺1954年加入香港警隊，1967年擔任彈道同拆彈專家，直至1975年退休為止。Hillsir最為人津津樂道嘅係喺67年暴動期間，喺短短六個月內拆咗數以百計嘅土製波蘿，仲因為咁翌年獲頒MBE勳銜。佢又曾經成功將喺尖沙嘴重慶大廈地盤發現到嘅一千磅轟炸機炸彈拆除。
Hillsir呢個月4號喺伊利沙伯醫院病逝，終年84歲。臨終時唔少警隊爆炸品處理課嘅同僚同後輩都嚟送別佢，可見佢嘅江湖地位。