恭喜！恭喜！37歲嘅譚耀文首次榮升老竇，譚太Fiona日前入院後，終於喺前日晚上8：50分順利誕下7.5磅重嘅男嬰，母子平安。
Fiona今次採取自然分娩，阿譚為咗幫太太打氣，都跟埋入產房，同醫生一齊為太太催生，阿譚噚日同馮仁昭傾開做老竇嘅心情時，依然好興奮，佢話：「我同醫生一齊叫one、two、three、four、five…大力push出嚟，到BB出世嗰一刻，好神聖，我太太眼濕濕，我都係。我係第一個抱BB嘅人，佢好精靈，我話畀佢聽你望吓呢邊，呢個係婆婆，佢就眼仔睩睩望住婆婆，我話呢個係嫲嫲，佢又跟住望，真係好得意。」
對眼似老竇
至於囝囝叫乜嘢名，阿譚就哈哈笑：「太陽神！Apollo18！你唔覺呢兩日好好天、陽光好好咩？都要睇吓書，了解BB嘅性格，至同佢改個好名。佢係12月18日8點50分出世，農曆係10月28號，好多8，係個八仔。BB對眼似我，但都似媽咪。」
由於阿譚之前一直喺內地拍電視劇，但太太係自然分娩，所以佢喺內地時一直坐唔安瞓唔落，又擔心太太身體唔知點，好彩佢比預算日期早咗回港，事關譚太預產期本來係今日，如果唔係錯失呢個人生重要時刻，就真係唔知點算咯。
