由全球市值最大銀行花旗集團為首嘅財團，入股重組後廣東發展銀行85.6%股權嘅交易，日前已正式完成資金交收，呢單交易可算係內地銀行重組發展嘅一個里程碑，一來因為廣發行係債務纍纍嘅問題銀行，二來新入股財團所佔嘅股權比率，亦係一個突破。仲有，花旗集團雖無廣發行管理控制權，但可以推薦人選出任行長。
花旗噚日終於公布廣發行新行長，此君喺花旗集團有19年工作經驗，之前任職花旗韓國企銀及投資銀行部高級執行副總裁嘅忻麥豪（MichaelZink），而廣發行原行長張光華，據聞已辭職，並可能喺明年加入招行任副行長。
花旗為首嘅財團成員名單，昨日亦全面披露，股權分布包括花旗、中國人壽、國家電網及中信信託，各持有廣發行20%股份，IBM及廣東粵財投資控股，則分別持有4.74%及0.85%。花旗將任命6名廣發行董事，當中包括1名獨立非執董。