熱錢炒呀炒，泰銖滙率由年初至今升咗16%，喺前日仲飆上35.08兌1美元的9年新高。見外滙投機唔多對路，泰國央行決定由噚日起，規定外資芬佬換泰銖過2萬美元，最多只可投資7成，該筆資金仲要喺當地擺足一年先攞得番，否則就充公當中三分一，至於保留喺銀行嘅3成金額就一毫子利息都冇。
唔知係咪呢劑「藥」太重，泰國SET指數噚日上晝跌超過10%，當局按例喺11點29分停市半個鐘，半日已跌12%，全日挫78.77點，收報433.23，創16年最大單日跌幅。
快人一步嘅網友se7en晏晝就喺《公眾投資168綜合論壇》公告泰股冧市嘅消息：「泰國SET指數因滙率改革風暴跌12%，今早曾經停板30分鐘，情況仍未許樂觀。」又係由泰國開始，佢好擔心「新金融風暴」重臨。
金融風暴難重現
網友小估民回應指：「大戶吹爆人哋個泡想散水，而家（泰國）實行拉閘放狗，賺咗錢唔俾走，同焗賭一樣，醒過上次好多，未必會爆股災。」
sdwin亦話：「泰國咁做，就係想避免金融風暴，對港股反而係好事。」
其實97年全亞洲之所以咁不幸，係當時泰國、大馬同埋南韓等國家長期倚賴中短期海外貸款維持國際收支平衡，導致滙率好唔恰當咁偏高，引嚟煲呔曾嘅死敵「大鱷」索羅斯等人大舉沽空泰銖，結果……唔使講。
新鴻基證券策略師彭偉新認為，泰股今鋪唔會拖累亞洲一齊坐艇，更冇可能爆發金融風暴，主要係泰國𠵱家冇97年嘅資產泡沬，呢幾招唔係打擊資金流入，純粹係增加外資嘅成本。佢話，雖然噚日泰國股份多數下滑，但相信市場會趁低吸納番，港人亦毋須心慌慌。