山頂地王呎價創新高,豪宅長升長有;相反,一般住宅就谷極唔升。發展商扭盡六壬,無論新樓喺將軍澳抑或上水、元朗,一律冠以豪宅之名,再加上各式各樣嘅噱頭,不過,網友就唔多受落。有網友喺《香港討論區》搞咗個「最差樓盤噱頭選舉」,31個網友喺7個樓盤中投票,結果大比數勝出嘅係「所有樓盤」。
Jt921211話:「我個人認為葡萄園的gimmick最差,九唔搭八。」Maytin扮到一本正經話:「鍾意飲酒嘅人,會覺得好正……如果係米酒、花雕、五加皮園,會冇咁崇洋。」Pulamore就好勞嘈:「如果有全年最差廣告選舉,呢堆新盤廣告一定上晒榜。如果消委會有最誤導消費者廣告嘅調查,呢堆新盤廣告亦一定入晒圍。如果班政客真係有guts,就唔好後知後覺,人反對佢又反對拆天星碼頭,企出嚟炮轟地產商賣樓手法嚴重誤導,一定更得民心。」
萬教之父更加就呢堆樓盤逐個「彈」:
君滙港──CEOliving
佢自己個CEO唔住吓?
嵐岸──納米豪宅
一粒骰已經係好細,你仲納米!縮水樓豪宅。
雍雅軒──九龍市區豪宅
呢個唔知佢個位,可能俾佢誤導係何文田。
豫豐花園──市區豪宅
雍雅軒x2
葡萄園──法國酒莊
係咩,買法國樓?
城中駅──2006年市區唯一地鐵上蓋豪宅
「地鐵上蓋,豪宅!」