工行A、H股上市呢單世紀deal，由上市到𠵱家都就嚟兩個月，之不過內地傳媒，仍然不忘發掘大大小小嘅花絮餘音，好似《廿一世紀經濟報道》咁，最近就透過高盛亞洲董事總經理胡祖六（圖）把口，講番身為策略投資者嘅高盛，係點樣同工行邂逅同埋譜出合作戀曲。
工行喺今年4月底，正式宣布由高盛牽頭，包括美國運通及德國安聯嘅策略投資者入股協議，但據胡祖六喺報道入面講，原來雙方早於04年已一見鍾情，仲喺當年11月1日，由雙方高層簽訂投資意向，其後高盛仲向工行提供咗短短一頁紙、但內容實在嘅投資建議書，為雙方最後合作框架訂下基礎。高盛仲罕有地成立咗一個工行辦公室，由亞洲區首席執行官MichaelEvans任負責人，高盛對工行嘅信任，仲熱切到穿針引線，間接促成運通與安聯齊齊入股工行嘅結果。