煲呔老婆貴為特區第一夫人，前日「懷疑」着皮草參加醫院管理局籌款晚會，搞到啲動物團體好鬼嬲，善待動物組織（PETA）仲即刻email去特首辦投訴。特首辦噚日終於回覆八方，話唔評論曾太嘅私人衣着，不過，各位讀者請注意：特首辦冇證實亦冇否認曾太着皮草。
PETA嘅代表余小姐話，特首辦仲未覆佢哋，但聽到特首辦咁講真係失望，曾太可以選擇着皮草，但被殺害嘅動物就冇得揀，如果曾太真係着皮草，佢哋就會將曾太列為全年最差衣着嘅候選人，仲會搵機會喺公開場合，向曾太展示啲動物點樣被屠殺，教育吓曾太以後唔好着皮草。
煲呔應該慶幸，好彩愛護動物組織喺選委會冇票，如果唔係呢鋪真係多得曾太唔少！