政府拆天星，惹來民情洶湧，有好多人話對天星特別係嗰個鐘樓好有感情，希望唔好拆得唔得？房屋及規劃地政局局長孫明揚話，如果係通過嘅法定程序，即係猶如打咗合同，唔能夠隨便話改就改，所以民意去到咁尾先話唔好拆天星，係遲咗啲喇！佢話搬走個天星係因為要讓路做繞道工程，唔搬會牽一髮動全身，絕對唔係有人所講嘅改少少好容易。
不過，天星𠵱家唔拆都拆咗，材料仲送咗去堆填，屍骸都搵唔番，可以點？孫公話，天星事件，畀政府一個啓示，就係以後做相關諮詢工作，要做得精細啲，例如啓德用地就係辦，最後方案係因應市民意見而修改，結果大家都開心。佢話，經驗係要靠累積，今次事件已冇得返轉頭，但對市民有忠告，就係有意見唔該早出聲，八方理解即係話如果要落車就早響，否則唔好怪司機飛站。