泰國嗰邊搞啲外滙管制嘅新措施，話唔畀人亂炒佢嘅貨幣，97年嗰次金融風暴搞到亞洲雞毛鴨血，泰國搞啲咁敏感嘅嘢，「金融風暴恐懼症候群」立即出現，港股呢兩日升得咁有氣勢，都頂唔住啲沽盤，唔知呢啲算唔算「君子不立危牆下」呢？再睇睇好多股票（尤其係國內嘅中堅股份保險股同銀行股）喺低位掃番晒上嚟，沽咗貨會唔會有啲後悔呢？炒股票嘅嘢梗係「君子不吃眼前虧」，唔明朗走咗先其實唔使後悔，最緊要睇清楚個局之後識上番車。
泰國嘅新措施係咪「金融風暴」嘅啓示不得而知，但係𠵱家的確睇唔到好實在嘅金融衝擊，實在毋須太憂慮。從技術形態及走勢睇，亦唔見得正掌握大局嘅好友會讓路畀班淡友，長假期後就係期指結算同年結，好淡雙方借一啲消息搶攻有利陣地都係合情合理。
H股指數現咗個「身懷六甲」，肚裏面有個「陀螺」，MACD仲升緊，成交縮減，已經具備反彈條件，國企股炒番高，個市嘅氣氛又會唔同晒。
恒生C輪4774：恒生（011）昨收104.60元，逆市升0.28%，股價前日以大陰燭回落，成交大增，走勢頗淡，但股價昨日守住保歷加通道頂線，以陽燭收市，成交只略為縮減，反映買盤喺現水平已相當積極，對後市嘅信心好強，睇番月線圖，股價喺上個月呈重要突破，睇嚟會有後着，恒生C輪4774行使價106元，同正股現價好接近，轉入價內，升勢會好勁，昨收21.1仙，槓桿率49.6倍（有效22.9倍），槓桿大好有爆炸力，注碼可以唔使咁大，正股升上106元，4774已經有近30%升幅，正股升上108元，隻輪會去到38仙嗰頭，正股跌穿103.50元止蝕。
俊樺