第二屆「恒隆數學獎」噚日公布得獎結果，恒隆喺金鐘萬豪酒店特別設咗午宴大搞呢件盛事。冠軍由聖公會林護紀念中學奪得，並攞到40萬蚊獎金，佢哋嘅專題題目係「如何令水保持冷凍」；銀獎得主係沙田官中，銅獎由王肇枝中學奪得；而新界西北嘅中學好似元朗商會中學同南屯門官立中學，都入圍得到優異獎。
主辦單位恒隆主席陳啓宗話，今屆有近100隊來自50多間中學參加，而評審委員會陣容強大，包括諾貝爾經濟學獎得主JamesA.Mirrlees，仲有來自劍橋大學、麻省理工、中國科學院、清華大學同康奈爾大學嘅名牌學府教授參與。佢哋為中學生做評審，會唔會大材小用呢？陳啓宗話，數學天才細細個就可發掘出嚟，而大學教授求才若渴，好樂意做呢啲評審工作。佢又好希望其他本港富豪出錢搞其他學術獎，好似物理、化學等，可助提高本港學術水平。