煲呔早排應白鴿黨邀請，大搖大擺去咗鯉魚門食海鮮，同白鴿黨老友記一邊歎紅酒、一邊食鮑魚炸雞生炒骨，大家不知幾friend；相反公民黨就一直坐冷板櫈，無緣同煲呔撐枱腳咁溫馨，再加上擺明單挑煲呔嘅梁大狀愈跑愈勇，已經唔係冇票嘅陪跑分子。勁敵當前，大家都以為煲呔一定唔會再約公民黨啦，「仇人」見面份外眼紅吖嘛。
如果係咁諗，大家就錯晒喇。因為煲呔噚晚靜悄悄去咗中國會同公民黨立法會議員食飯。由於Margaret吳靄儀同張超雄有事在身，所以只得立法會四丁友赴會，除咗余大狀、湯大狀同譚香文，自然唔少得會同煲呔喺明年特首戰場上片過嘅袋巾梁啦。另外關信基主席、陳家洛、黎廣德及毛孟靜都成為座上客。
據知今次會面，公民黨幾個月前已約晤對方。余大狀早前已經講過，話煲呔喺梁大狀宣布會參選之後，已經提出過同公民黨會面，只係一直未有安排，最後可能為避免無了期咁等待，所以就安排咗喺噚日食。
金勞詹薦田少參選
誇張啲講句，呢場真係世紀飯局，兩個特首候選人同枱食飯，唔講特首選舉有乜好講？至少煲呔可以八吓梁大狀嘅選舉工程，等下星期北上述職時可以爆吓料畀領導人聽。但湯大狀會後強調，今次真係冇講特首選舉，亦冇恭喜梁大狀，反而猛講湊大一個細路要幾多錢，總之無公事可言，最終張單就由公民黨埋咗。
呢輪政府民望大插水，煲呔特首寶座有少少動搖，近來唔知點解又有好多風吹出嚟，話會有第三個人選特首。上年為玩嘢參選特首嘅金勞詹自爆，覺得田少最有條件出嚟選，上星期仲游說過田少去馬，可惜田少唔肯，睇怕都係驚啲商界友好飛唔穩啩！
金勞詹就唔係咁睇，佢話田少印印腳做地產收租，又唔使賣煲呔賬，出嚟選特首冇嘢好驚㗎，可惜田少都係唔落叠。
另一個放風嘅人就係葉劉，佢前日同啲左報話，有唔係泛泛之輩嘅人想選特首，但又冇講係邊個喎，鄭大班就寸葉劉咁講都係博見報啫。
