鄉議局喺選委會坐擁21席，都算唔少票，據聞梁大狀都對呢21票虎視眈眈，稍後會去信鄉議局，希望有機會同班鄉紳大佬坐低傾偈，等佢呢位番書仔可以解釋一吓施政理念，睇吓有冇機會喺鄉紳身上攞番幾票。
不過，要攞班鄉紳票真係唔太容易，鄉議局主席劉皇發先旨聲明，話新界人對梁大狀雖則冇乜反感；但係咪有好感呢，就係另一回事喎。要攞票，佢話要睇吓梁大狀有咩本事，唔係求其話畀就畀㗎。但可以肯定嘅係，只要梁大狀發出見面邀請，鄉議局會欣然接受。
除咗自己個界別，鄉議局仲會同埋同聲同氣嘅漁農界以及區議會友好選委，坐埋傾傾對未來特首嘅期望。單計呢三個界別，就已經有成幾十票，係一個龐大嘅勢力，睇怕煲呔第時唔請都會自動送上門話要傾偈喇。