廸士尼一向篤信風水，香港廸士尼樂園行政總裁安明智噚日同八方講，最近佢出外公幹後返回自己嘅辦公室，成間房除咗佢自己冇變之外，一切都變晒，差啲連自己都唔認得。佢話，早前廸士尼御用風水大師（廸士尼一直冇提過此高人是誰，但係喺廸士尼開幕禮上只見到堪輿學家蘇民峰出席）參觀過佢嘅辦公室，之後就叫佢左改右改，仲話唔好問咁多，總之要聽話改咗就好晒。
安明智間房由以前嘅藍色變成綠色，門口就加咗個屏風，總之就唔可以一踏入門口就見到佢，再加埋佢嘅辦公桌由以前對住門口，變咗望住個樂園。八方問佢轉嚟轉去，係咪真係好咗，安明智話，又真係郁一郁，人都順風順水咗，所以話就算唔明點解都一定要信風水，真係信不信由你。