唔知近排大家抽新股之餘，有冇留意海天國際（1882）本招股書呢？如果大家細心睇吓，會發現海天本招股書上面個保薦人嘜頭，已經變咗「BNPPARIBAS」再加4粒星，再唔係以前嘅「法國巴黎百富勤」。原來一代股壇游隼百富勤（因為百富勤英文名Peregine便是隼。而隼屬鷹的一種），終於正式謝幕退場。
華華八卦所得，中文名叫法國巴黎融資嘅BNPPARIBAS，喺年頭已開始搞重組，目的係將百富勤融入集團，而法國巴黎百富勤呢個自98年沿用至今嘅過渡性嘜頭，亦正式喺今個月完成歷史任務。聽講話，佢哋自己喺本月7號已經全部改用法國巴黎融資，連電郵地址都改埋。
由於改名係喺今個月發生，好多招股書裏面嘅名都有啲出入，好似佢哋有份做副牽頭經辦人嘅株洲南車（3898），佢哋仲係用緊法國巴黎百富勤個朵。
而佢自己做保薦人，喺上月底開始招股嘅錦江國際（2006）就未改，要到海天國際招股，先至用新名。
法國佬好畀面
有老前輩同華華講，其實自從百記賣盤畀法國佬後，當年百記嘅人都差唔多走晒，今次正式搣咗百富勤個名，應該都唔會有乜人會感到傷感啦！老前輩仲話，其實法國佬買咗百記咁耐先搣咗個名，都算畀足面啦！唔知百富勤創辦人之一梁伯韜有冇感觸呢？
講開又講，既然梁伯韜收購電盈（008）失敗，而家百富勤個朵又回復自由身，加上近排啲中國概念又咁得，唔知佢會唔會想攞番個名再創業呢？
[email protected]