聖誕嚟緊，每次搞party，大家都鍾意飲幾杯紅酒。前晚喺我香閨宴請同事時，雄雄嘅表現嚇咗大家一跳，因為佢走去廚房問我個賓賓，攞咗半嚿洋葱放入杯紅酒，浸咗一陣就施施然飲咗呢杯「哽嘢」。
大家呆咗半秒後，爭相問佢有乜睇唔開。佢話阿媽同外母都係咁飲，紅酒加洋葱一齊飲可助抗心臟病、通血管等。我之後上網睇過，好多人講過呢個坊間秘方。
家庭醫生關嘉美同我講，紅酒對心臟健康確實有一定幫助，但主要係來自葡萄皮，食葡萄已經攞到呢種好處，紅酒嘅酒精始終係傷肝，飲得多都唔係太好。佢又話，洋葱、葱同大蒜等係有抗氧化作用，幫助對抗心血管疾病，「但溝埋紅酒啲味道咁怪，做乜要折磨自己，煮餸落啲葱咪得囉！」佢話，好多人相信坊間「秘方」後，好容易沉迷，最擔心係最後有病唔去睇醫生，咁就弊家伙。
逢周一至周四刊出