長實嘅將軍澳都會駅最近入伙，除樓盤質素成為網友茶餘飯後話題外，會所未開放就要收足管理費，一樣受到各方非議。
住客之一嘅bassanio、法國3988、nichan22一致認為，都會駅會所仍未起好，居民無法享用，管理公司冇理由「博大霧」，繼續收足每呎1.6元嘅管理費，應該減管理費先至公道。
傳2008年至竣工
其中bassanio就語帶雙關咁話︰「興建中就唔好叫人收樓，對面2期沙塵滾滾，放工回家又唔可以去clubhouse減壓，大家都知買咗都會駅有幾大壓力！」佢仲話，聽聞會所要喺2008年先至竣工，唔通發展商真係想鍛煉大家嘅EQ！
網友fwho、Anita_block皆贊成住客要齊心一致，向管理公司提出減管理費嘅訴求，不過，佢哋就擔心對方未必會咁「順攤」。Anita_block估計︰「佢可能會話已經減咗，有會所用時要再加管理費……」
本報就網友嘅疑問，分別向長實及地鐵管理公司查詢。長實發言人指，管理費屬於地鐵管理公司工作範圍，建議記者問地鐵。
地鐵就對記者講，都會駅管理費其實係每呎1.5元，並唔係網民所講嘅每呎1.6元，而計算方法係以屋苑整體嚟睇，好似日常管理、維修保養等。發言人仲話，雖然𠵱家會所暫時未開放，但管理公司早已經招聘好人手做準備工夫，所以呢方面嘅開支，都要計算在管理費之內。
既然管理公司都話已經「招兵買馬」，睇嚟都會駅嘅會所應該會好快開放，住戶惟有耐心忍耐多一陣啦！