違規將觀音山倉庫改建成豪宅而成為新聞熱爆人物嘅煲呔表哥香灼璣，早排簡直好似人間蒸發咁失晒蹤，睇怕都係唔想俾傳媒提及佢嘅傷心事。
不過，時間係療傷嘅最好工具，噚日八方喺鄉議局見到煲呔表哥出席，證明佢已經諗通。香灼璣話自己冇乜唔開心，仲自爆同屋企人住喺新界，只係冇講明係咪佢嘅自置物業，仲一再強調，關於以上事件真係nocomment，要講嘅嘢已經講晒，總之𠵱家ok啦。
煲呔表哥係選委成員，煲呔有呢位表弟有冇着數呢？sorry，表哥話要跟鄉議局大隊投票，換言之唔一定畀票表哥。近期天星事件鬧哄哄，煲呔表哥係古物諮詢委員會成員，梗係要問佢點睇？點知煲呔表哥好玄咁話：好多嘢都估佢唔到㗎，明顯係有感而發，例如佢都估唔到觀音山事件會搞到咁大鑊囉。