泰國突然實施外滙管制，搞到泰股一度急跌兩成，收市跌14%，成個東南亞股市，即時愁雲慘霧，新加坡、馬來西亞同印尼股市都跌約2%，香港跌228點，算係跌得少。又係嘅，97年官鱷大戰香港都唔使滙管，𠵱家更無理由，反而曾淵滄教授講過聯滙之下對沖基金炒港元升值會變成點，呢個題目更加有趣。
泰國自從9月出現軍事政變之後，由軍人臨時政府執政，而臨時政府剛於本周一公布新議會1982人名單，成員由軍人執政團挑選，任務為泰國政變後憲法挑選起草人。換句話講，新憲法嘅起草並無任何民主過程參與，睇嚟泰國嘅政治風險，都係跌市原因之一。
同泰國有關嘅上市公司，會即時諗到卜蜂（043），不過卜蜂股價就不跌反升12%，而且以全日最高位收，完全唔受泰股下跌影響。睇返圖表，卜蜂今年最高位0.56元，上月最低跌到0.123元，8個幾月股價跌咗近8成，反彈吓都要啩。
泰資股仲有隻寶光實業（084），股價連跌3日，主要係因為中期業績倒退44%所致，同樣做鐘錶生意，宜進利（304）業績同股價都屢創新高，同一個行業，居然業績都可以差咁遠。
從事珠寶首飾零售嘅六福集團（590）噚日公布業績，中期純利增長近兩倍，刺激股價急升逾17%。六福中期純利8477萬元，每股盈利17.29仙。假如下半年盈利相若，全年每股盈利34.58仙，公司PE僅5.5倍，又的確幾平。業績顯示，純利增長確實係由營業額增長帶動而非特殊項目，可趁回吐低吸。
歐陽風