民建聯副主席譚耀宗上星期五牛一，踏入人生中第57個年頭，真係恭喜晒。譚sir一向嘅生日格言係：無事就生日，有事就唔生日，總之唔使搞咁多嘢。
查實今年生日譚sir都係由朝忙到晚，但一班伙記就堅持要請佢食晚飯，盛情難卻，結果就同太太一齊出席慶祝，都算罕有。不過食到一半，譚sir就要急急鬆腳走人，唔係佢唔畀面，而係佢又要趕去荃灣區聽居民申訴，生日都冇得停工，鬼叫佢係直選議員咩。
好彩呢次趕頭趕命都唔係完全冇收穫，事關佢聽完居民意見後，某業主立案法團嘅女成員竟然失驚無神送佢一束鮮花，祝佢生日快樂，令譚sir受寵若驚。堂堂一個大男人，竟然有女人送花喎，聽落都令人羨慕，最緊要係譚太唔好呷醋就得喇。