我冇咁好彩做到李太，要繼續返工。好多女同事冇晒心機，望住報紙歎氣，徐子淇嫁咗畀李家誠，我哋又少一個「嫁個有錢人」嘅chance。阿敏有啲戚戚然咁話：「嫁咗唔使做梗係好，但最好係唔使再節食減肥，你睇佢個肚腩……」
未嫁得出，大家lunch時繼續食沙律減肥。Wincy攞包預先包裝沙律蔬菜出嚟，洗都唔洗就食，我喝止佢：「嫁唔出都唔使睇唔開，有菌㗎。」但Wincy話包菜寫明唔使洗就可以食。吓？真唔真呀。
消委會老友記Connie話，切開咗嘅蔬菜、水果，比原棵嘅蔬菜同未切開嘅水果，較容易受微生物污染，因為剁碎或者將蔬菜切絲時，流出嚟嘅植物細胞液，可以提供養料俾微生物滋長，所以最好都係先洗洗佢。食環署資料顯示，經最少加工嘅即食蔬菜可能含有李斯特菌，泥土都天然存在微生物，處理不當可能增加因為食菜而感染疾病嘅風險。
逢周一至周四刊出