未到聖誕，已經有好多金融界老友放咗假，或心情上放假，但係股市十分暢旺，成交額有五、六百億，身為經紀，點捨得啲生意唔做呀！經紀Ｍ今年已經收到盤滿缽滿，往年呢個時候已經唔喺香港，今年因情況特別，一於做到聖誕前夕，不過假期情懷已開始咗，如何是好？今年係經紀肥年，用錢冇計啫，於是經紀Ｍ與老公有山頂大宅唔住，訂咗文華東方酒店住幾日，當係在放假期中。經紀Ｍ話：「文華東方裝修之後，唔知變成點，所以要住吓，睇吓點。」其他酒店呢？
經紀Ｍ話：「我住過四季酒店嘅房夠大，海景靚，住得好舒服，只係行去中環其他地方，每每要十幾分鐘，搭的士，郵局旁邊好塞車，干諾道中亦塞車，唔係幾方便。曾經住過置地文華，房間夠hi-tech摩登，但我唔鍾意浴缸就在房中央；君悅呀，有老態咯，房間又細，唔夠現代。」想來經紀Ｍ經常與老公住酒店，換吓環境增加情趣。
啲酒店房租咁貴，譬如近期住四季，要成五百美元一晚，本地人去住，如非有銀，你估貪過癮乎。經紀Ｍ間公司最近要請一啲識講流利普通話嘅歐洲人，以爭取歐洲客戶買中資股。佢有一位世姪係荷蘭人，大學讀文學，畢業後冇乜好做，浪遊世界一年，經紀Ｍ鼓勵世姪讀中文。呢位荷蘭小伙子卒之下定決心，去北京學中文，一年半之後，竟可以寫中文電郵畀經紀Ｍ討論時事。
幾個月前，荷蘭青年畢業回國，路經香港，經紀Ｍ立即捉住佢，打算請佢做trainee，他日委以重任。點知荷蘭青年話：「一早已經俾荷蘭嘅巨型基金公司招聘咗咯，真對唔住。原來學曉中文好有用，上星期有兩間獵頭公司搵過我，我嘅身價日日有升幅。」
唔怪得英國商界嘈政府，要求英國學校多教中文，由小學開始。英國商會策略總監薩利．洛希話：「商業對中國普通話及烏爾都語（巴基斯坦）嘅需求，大過對法文及德文」，法國總統希拉克聽見，怕會激氣到面紅耳熱。