被譽為天子門生嘅政務官，愈嚟愈多人唔滿意𠵱家個政府同政局，特別係一班中層嘅中堅分子，唔少人有離心，更加有人積極向外搵工，今年下半年已經有兩個首長級政務官劈炮，真係令人擔心。
舊年係年輕政務官嘅離職潮，共有16名政務官離職，97後從未見過咁大批，佢哋多數係唔滿意政府做得咁差，當政務官又變咗做打雜，完全唔係理想中咁樣，不如早啲離開，加入商界發展。好似嗰個地鐵縱火案嘅季英雄，𠵱家實習完，正式做大律師。另一個大家最近都聽過嘅名字，叫做黃明樂，出去進修一年後返嚟去咗幫公民黨。仲有一個黃楚峰，返屋企打家族生意嘅工，風流快活，佢哋三個都仍然好關心個政治社會，有心從政，或者第日會見到佢哋齊齊出嚟參選，調轉槍頭向番政府都唔定。
冇時間思考未來藍圖
今年政務官圈中，最有離心係班中堅分子嘅中層政務官，例如首席助理同埋副秘書長啲級數，佢哋月薪都已經達12萬以上。近月就有兩個人用腳投票，離開咗政府，分別係民政事務局副秘書長馮永業、房屋及規劃地政局首席助理秘書長高國權。
馮永業過檔生產力促進局做總裁，高國權就冇留低任何消息，啲同僚都覺得好突然，佢只留下一句他日有緣可相逢。
政務官圈子都話佢兩個人好醒目，都係好有前途嘅，不過官運暫時唔係咁好，晉升冇特別快，好多無能之輩都爬晒佢哋頭。仲有就係個政府依然係運作得唔好，問責局長同政務官磨合不順，立法會議員低水平嘅質詢，卻往往耗費官員三分一工作時間，令官員根本只能夠應付眼前嘅炸彈，冇時間去思索將來嘅香港藍圖，喺咁嘅環境做落去都冇用，對香港前途冇幫助，不如抽身離去。
呢種不滿嘅怨氣瀰漫整個政府，八方聽過唔少資深政務官話，如果政府再推自願離職計劃，佢一定參加。